सुस्वागतम

                             सुस्वागतम 

 

ब्लॉगला भेट देणाऱ्या आमच्या सर्व हितचिंतकांचे आम्ही सहर्ष स्वागत करत आहोत. 

 स्वागतोत्सुक  :

  शिक्षण विभाग, पंचायत समिती, हवेली, जिल्हा : पुणे.

 

ग्रामपंचायत थेऊर, तालुका : हवेली, जिल्हा : पुणे.

केंद्रप्रमुख केंद्र : थेऊर , तालुका: हवेली, जिल्हा: पुणे.

शाळा व्यवस्थापन समिती, जि.प.प्राथमिक शाळा, तारमळा, थेऊर.

सर्व ग्रामस्थ, पालक, विद्यार्थी व शिक्षक शाळा- तारमळा,थेऊर  

               धन्यवाद !

गणेश जयंती ---आणखी एक नाविन्यपूर्ण उपक्रम

  गणेश जयंती ---आणखी एक नाविन्यपूर्ण उपक्रम  

             माघ शुद्ध चतुर्थी --- श्री गणेश जयंती. थेऊर हे अष्टविनायकांपैकी गणेशाचे एक ठिकाण. चिंतामणी गणपतीची कृपा थेऊर गावावर आहे. या थेऊर गावातच तारमळा ही शाळा असल्याने आमचीही गणेशावर श्रद्धा आहे आणि गणेशाची आमच्यावर कृपा आहे. 

            माघ शुद्ध चतुर्थी या दिवशी शाळेत गणेश जयंती मोठ्या उत्साहात साजरी करण्यात आली. चौदा विद्या आणि चौसष्ट कलांचा अधिपती असणारा गणेश --- बाल गणेशाचा जन्मदिन मुलांनी स्वतःच्या वाढदिवसापेक्षाही आंनदाने साजरा केला. या प्रसंगी शाळेने मुलांना खाऊ वाटप केले.

                 बालगणेशाच्या जन्म सोहळ्याची काही क्षणचित्रे   

 

२६ जानेवारी -- प्रजासत्ताक दिन

२६ जानेवारी -- प्रजासत्ताक दिन

                   २६ जानेवारी भारताचा प्रजासत्ताक दिन, सर्व भारतीयांना अभिमान वाटावा असा दिवस. सर्वच शाळांमध्ये हा दिवस अतिशय उत्साहाने व आनंदाने साजरा केला जातो. जिल्हा परिषद प्राथमिक शाळा, तारमळा येथे हा दिवस आनंदात साजरा करण्यात आला. 

                या प्रसंगी ध्वजारोहण कार्यक्रमाचे नियोजन करण्यात आले. राष्ट्रध्वजाला मानवंदना देण्यात आली. या कार्यक्रमाला शाळा व्यवस्थापन समिती अध्यक्ष, उपाध्यक्ष, सदस्य, सर्व पालक, गावातील मान्यवर, शिक्षक आणि विद्यार्थी उपस्थित होते. 

               या वर्षीचा कार्यक्रम आमच्या शाळेसाठी विशेष महत्त्वाचा ठरला. कारण शाळेत ई-लर्निंगचे उद्घाटन करण्यात आले. इयत्ता पहिली ते चौथीच्या सर्व वर्गांचा अभ्यासक्रम असणारा ई -लर्निंगचा सेट शाळेला देणगीस्वरुपात प्राप्त झाला.

                सप्टेंबर महिन्यात मलेशिया येथील सरोज व संगिता  मॅडम यांनी शाळेला सदिच्छा भेट दिली होती. शाळेच्या विविध उपक्रमाची माहिती ई -मेल आणि व्हॉट्सअपच्या माध्यमातून त्यांना दिली जात होती. प्रसार माध्यमाचा एक अतिशय चांगला फायदा शाळेला झाला. सुमारे ४५०००/- रुपये किमतीचा ई-लर्निंग सेट शाळेला मलेशियाच्या पाहुण्यांनी देणगीस्वरुपात दिला. सर्वात आश्चर्य आणि अभिमानाची बाब म्हणजे मुलांना सरप्राईज मिळावे आणि प्रजासत्ताक दिनी उद्घाटन व्हावे  या उद्देशाने २५/०१/२०१७ रोजी रात्री सर्वांनी मिळून शाळेत प्रोजेक्टरचे सेट अप केले. २६/०१/२०१७ रोजी सकाळी उत्साहात उद्घाटन झाले.

              शाळा व्यवस्थापन समिती अध्यक्ष आणि शिक्षक यांनी केल्या प्रयत्नांना मिळालेले हे फार मोठे यश आहे. नवीन इमारतीमध्ये डिजिटल क्लासरूम तयार करण्याच्या दृष्टीने टाकलेले हे पहिले यशस्वी पाउल ठरले. 

              मुलांसाठी ही एक आनंदपर्वणी ठरली. ग्रामस्थांनीही हा आनंद पेढे वाटून साजरा केला. 

                                           क्षणचित्रे

  

बालगोकुलम २०१६ -- पुणे

बालगोकुलम २०१६ -- पुणे 

             अक्षरभारती संस्था, पुणे या संस्थेचे वाचनालय आपल्या जिल्हा परिषद प्राथमिक शाळेत चालवले जाते. दिनांक ०७/०१/२०१७ शनिवार रोजी या संस्थेचा वार्षिक वर्धापनदिन बालगोकुलम या नावाने इंजिनियरिंग कॉलेज ग्राउंड शिवाजीनगर, पुणे या ठिकाणी पार पडला.
            या कार्यक्रमाला जिल्हाभरातून अनेक शाळा व अनेक विद्यार्थी उपस्थित होते. आपल्या शाळेतील मुलांच्या दृष्टीने हा कार्यक्रम म्हणजे आनंदाची एक पर्वणी होती.
             शाळेतील शिक्षक मुलांना पुण्याच्या मध्यवर्ती ठिकाणी घेऊन जावे कि नाही या द्विधा मनस्थितीत होते.परंतू शाळा व्यवस्थापन समितीचे माजी अध्यक्ष श्री. रामचंद्र बोडके आणि शाळा व्यवस्थापन समितीचे विद्यमान अध्यक्ष श्री. सुशांत काळे यांनी मुलांना नेणे व आणणे ही जबाबदारी उचलली आणि मुलांनी एक आगळावेगळा अनुभव घेतला. सुमारे १०८ वर्षांची परंपरा लाभलेल्या या भव्य वास्तूमध्ये विविध कार्यक्रमांचा आनंद मुलांनी लुटला.
           सकाळच्या सत्रात मुलांसाठी प्रश्न मंजुषा या कार्यक्रमाचे नियोजन केले होते. सर्व मुलांनी या उपक्रमात भाग घेतला. या वेळी शिक्षकांसाठी व्यक्तिमत्त्व विकास या कार्यक्रमातून महत्त्वाच्या टिप्स देण्यात आल्या. यानंतर मुलांसाठी विविध खेळांचे नियोजन केले होते. खेळाचा आनंद घेऊन मुलांनी स्वादिष्ट भोजनाचा आस्वाद घेतला.
          दुपारच्या सत्रात भव्य अशा सभागृहात सांस्कृतिक कार्यक्रमाचे नियोजन करण्यात आले होते. कॉलेजच्या मुलांनी विविध देशभक्तीपर गीते, नृत्य व नाटिका सादर केल्या. 
           त्यानंतर पुरस्कार वितरण समारंभाचे आयोजन करण्यात आले होते. या प्रसंगी प्रसिद्ध चित्रपट अभिनेते मान. श्री. राहुल सोलापूरकर उपस्थित होते. सर्व सभागृह त्यांच्या अमोघ वाणीतील भाषणाने भारावून गेले.
          या आनंदाची लयलूट मुले करत असतानाच एक घोषणा झाली---- विविध शैक्षणिक, सांस्कृतिक व सामाजिक उपक्रम राबवित असलेल्या जिल्हा परिषद प्राथमिक शाळा तारामळा या शाळेतील शिक्षिका श्रीमती. सरिता परदेशी यांनी आपले पारितोषिक घेण्यासाठी व्यासपीठावर यावे. ही घोषणा ऐकताच मुलांनी केलेला जल्लोष केवळ अवर्णनीय होता.
         मान. श्री. राहुल सोलापूरकर यांच्या हस्ते मुलांनी बक्षिस स्वीकारले. हा क्षण मुलांच्या दृष्टीने एक सोनेरी क्षण होता. 
           या वास्तूतील विविध रचना, सभागृहाची रचना, वेगवेगळे कक्ष, हा सर्व अनुभव मुलांना केवळ नवीनच नाही तार अविस्मरणीय होता. येताना सर्व मुलांना संस्थेकडून भेट म्हणून रोपे मिळाली. ही रोपे मुलांनी रुजवली,जगवली आणि वाढवली.या रोपांच्या रुपात या कार्यक्रमाची आठवण मुलांच्या दारात रुजली आहे.
                    सोनेरी आठवणीची रुपेरी छायाचित्रे